Одржани 24-ти Републички спортски игри на лица со телесен инвалидитет на Македонија

Дваесет и четвртите Републички спортски игри на лица со телесен инвалидитет на Македонија се одржаа од 08-10.06.2012 година на спортските терени во Струга и Охрид, а во организација на Националниот сојуз на лица со телесен инвалидитет на Македонија – Мобилност Македонија и во соорганизација со Националната федерација за спорт и рекреација на инвалидите на Македонија – Македонски параолимписки комитет. Спортистите беа сместени во хотелот “Галеб” во Струга, додека натпреварите се одржаа: стрелаштвото на стрелиштето „Бејбунар“ во Охрид, атлетиката на стадионот на ФК “Караорман” во Струга и пинг понгот во малата сала „Нико Нестор” во Струга. Ова е убава прилика да им изразиме голема благодарност на спортските работници од ФК „Караорман” од Струга, кои и овојпат дозволија бесплатно користење на стадионот за одржување на натпреварите во атлетски повеќебој.

            На 24-те Републички спортски игри на лицата со телесен инвалидитет на Македонија учествуваа 76 натпреварувачи (од кои 22 беа жени) од 16 општински и меѓуопштински здруженија на лица со телесен инвалидитет од државата. Единствено членовите на екипата на Мобилност Свети Николе повторно не настапија на игрите и поред силните напори да се обезбеди нивното учество. Оваа година на игрите учествуваа и тројца натпреварувачи – јуниори и тоа: Елена Давитковска од Кратово во атлњтика, Димитар Боцевски од Скопје и Аглел Џуковски од Скопје, и двајцата во стрелаштво со воздушна пушка.

            Свеченото отворање на игрите се случи во вечерните часови на денот на пристигнувањето на учесниците на игрите во големата сала на хотелот “Галеб” во Струга. По неколку пригодни зборови и со желба спортските натпревари да поминат во коректна, фер и спортска атмосвера, претседателот на Мобилност Македонија, Бранимир Јовановски, ги прогласи игрите за отворени.

Во периодот кои им претходеше на игрите, Стручната комисија донесе Правилник за одржување на игрите, пречистен список на директно квалификувани спортисти и изготви листа на пријавени спортисти по одделни спортови, состави програма за одржување на игрите и сите овие акти беа верифицирани од УО на Мобилност Македонија. Исто така се донесе одлука при класифицирањето на новите спортисти и понатаму да биде користена класификацијата што пред неколку години ја направи меѓународниот класификатор во атлетика, г-дин Гетош од Хрватска и класификаторката во пинг понг, г-ѓа Романа Романов од Србија, како и според меѓународните правила и критеријуми кои важат за пооделни спортови. Новопријавените спортисти на игрите, како и досега, беа класифицирани од страна на Др. Нико Јанков и Бранимир Јовановски. За разлика од минатите години кога др.Нико се грижеше за здравјето на спортистите, оваа година заради оправдани причини остана само за време на класификација на спортистите, додека за време на натпреварите во атлетика беше ангажиран лекар од Струга. Спортистите од општа категорија во машка и во женска конкуренција во атлетика се натпреваруваа во редовна конкуренција, со тоа што тие фрлаа со тежина на реквизити за атлетичари без инвалидност, а коефициент за пресметка на бодови се земаше од категоријата Ф46. Останатите спортисти се натпреваруваа со тежина на реквизити пропишана за нивната инвалидност од страна на атлетската секција при параолимпискиот комитет. Комисијата за жалби и приговори во состав: Бранимир Јовановски, Драган Дојчиноски и Софче Прчева благодарение на коректноста на натпреварувачите немаше ниту една интервенција, ниту предмет за решавање.

            Првиот натпреварувачки ден во 17 часот започнаа натпреварите во стрелаштво. Натпреварите се одвиваа во 4 спортски дисциплини во категорија мажи, жени и микс категорија. Највреден резултат постигна параолимпијката Оливера Наковска-Бикова со резултат од 378 кругови во категорија жени и 568 кругови во категорија микс, убедливо го освои првото место. Да и посакаме ваков резултат да постигне и на Параолимписките игри во Лондон. Останатите постигнати резултати на другите стрелци немаа некоја посебна вредност и беа во висина на просечните постигнати резултати.

Воздушна пушка мажи – СХ1

Воздушна пушка жени – СХ1

Воздушна пушка микс – СХ2

Воздушен пиштол микс – СХ1

Вториот натпреварувачки ден со почеток во 09 часот на помошниот терен на стадионот на ФК “Караорман” во Струга се одржаа натпреварите во атлетски повеќебој во фрлачки дисциплини за сите категории. Борбите се одвиваа едновремено на три борилишта: копје, ѓуле и диск. Најнапред настапија натпреварувачите во категорија седење и во категоријата жени стоење. За разлика од минатите години кога народски кажано времето чекавме да “додржи”, бидејќи обилните дождови започнуваа веднаш по завршување на натпреварите, оваа година токму спротивно беше изгор жешко и без ниедно облаче на небото. Натпреварите се одржаа на исклучително жешко време со температура од 35 степени целзиусови. Секако дека најтешко им беше на судиите кои цело време беа на теренот, без можност барем за малку да се сокријат под сенка.

            Во натпреварите во атлетика беа постигнати следните резултати и пласмани:

Мажи класи Ф54-Ф57

Жени класи Ф55-Ф58

Жени класи Ф42-Ф46 и општа

Мажи класи Ф37-Ф46 и општа

            Мора да истакнеме дека одредени спортисти во некои дисциплини не успеаја да постигнат резултати над пропишаните минимум норми, и ќе бидат предмет на разгледување од страна на стручната комисија која ќе му даде предлог на Управниот одбор како да постапи и какви мерки да преземе.

            Истиот ден, во 17,00 часот беа спроведени натпреварите во пинг понг во сите категории. Во малата сала во склоп на спортската сала „Нико Нестор“ во Струга на три маси за пласман разигруваа натпреварувачите: мажи и жени – микс 3-5, мажи 6-8, мажи 9-10 и жени 6-10.  Резултати:

Мажи и жени седење (микс) класи 3-5 

1. Трајче Стојановски
2. Муштеба Амети
3. Ристо Фотевски
4. Нурије Фаризи
5. Игор Димитриев
6. Зоран Јовановски
7. Илчо Кангов
8. Живка Мицова

Мажи класи 6-8

1. Рубинчо Ристески
2. Томи Јаневски
3. Тони Митровски
4. Николчо Делов
5. Марјан Зафировски
6. Васко Стефановски
7. Пецо Петковски

Мажи класи 9-10

1. Страшко Коцевски
2. Небојша Ташиќ
3. Дејан Алексовски
4. Александар Димоски
5. Ванчо Иванов
6. Дејан Ѓорѓиевски
7. Љурзим Бавтовски

Жени класи 6-10

1. Олга Ристовска
2. Снежана Танеска
3. Лилјана Мицовска
4. Магдалена Делова
5. Велика Станишева

Спортистите во трите спортови кои директно се квалификувани за следните јубилејни дваесет и петти спортски игри во табелите се обележени со болдирани (затемнети) букви.

            Завршната вечер беше исполнета со ведро расположение на учесниците, а истата започна со прогласување на резултатите и доделување на медали за постигнатите успеси од страна на генералниот на НФСРИМ-МПК Драган Дојчиноски. На крајот од официјалниот дел, претседателот на Мобилност Македонија ги прогласи игрите за затворени со очекување на следните 25-ти по ред спортски игри да бидат постигнати повисоки резултати и да земат учество поголем број на млади спортисти.

                                                                                                            Б. Јовановски