МОБИЛНОСТ МАКЕДОНИЈА

Изложба на слики од 3-та меѓународна Ликовна колонија Охрид 2012

Во предвечерието на одбележувањето на „3 Декември“ – Меѓународниот ден на лицата со инвалидност, Националниот сојуз на лицата со телесен инвалидитет на Македонија – Мобилност Македонија, на 03.12.2012 година со почеток во 20 часот во галерискиот простор на „Порта Македонија“ во Скопје ја организираше изложбата на слики од третата меѓународна ликовна колонија Охрид 2012. Изложбата имаше донаторски карактер, уметничките дела насликани од академски уметници и талентирани лица со телесен инвалидитет беа понудени на продажба по симбилична цена од 200 евра во денарска противвредност. Исклучително важно е да се потенцира дека финансиските средства прибрaни од продадените уметнички дела ќе бидат употребени за натамошно зголемување на обемот и квалитетот на сликарската колонија во смисол, поред академските сликари, да бидат вклучени поголем број на лица со телесен инвалидитет од државите од регионот, како и за постојаните активности за остварување и подобрување на правата на лицата со телесен инвалидитет во Македонија.

На изложбата присуствуваа членови од неколку наши општински и меѓуопштински здруженија, уметници, музичари, претставници на бизнис секторот, како и многу граѓани, почитувачи на активностите на Мобилност Македонија.

Националниот сојуз на лицата со телесен инвалидитет на Македонија – Мобилност Македонија одбележувањето на Меѓународниот ден на лицата со инвалидност „3-ти Декември“ го реализираше во соработка со останатите национални инвалидски организации во составот на НСИОМ на централна прослава одржана на 03.12.2012 година во големата сала на ДХО „Даре Џамбаз“ во Скопје. На одбележувањето поред претставниците на националните инвалидски организации здружени во НСИОМ, присуствуваше и министерот за труд и социјална политика, Спиро Ристовски, кој во своето обраќање до присутните говореше за значењето на денот и за заложбите и активностите кои министерството за труд и социјална политика ги презема за подобрување на положбата на лицата со инвалидност во Република Македонија. На одбележувањето присуствуваа и претставници од: здруженијата членки на националните инвалидски организации, здруженија на граѓани за подршка на лицата со инвалидност, други невладини организации, министерства, научни институции, здравствени институции, образовни институции,  социјални установи и институции, како и поголем број на наши членови.

По повод одбележувањето на 65 годишнината на  „Макпетрол“А.Д.-Скопје, Управниот одбор на „Макпетрол“А.Д.-Скопје донесе одлука со која се одобруваат средства за активности за одбележување на нивниот јубилеј и средства за донации.

„Макпетрол“А.Д.-Скопје,  на Специјалната болница за ортопедија и трауматологија во Охрид „Св.Еразмо“ донираше болничка постелнина и телевизори.

На Јавната установа детски дом „11 Октомври“ во Скопје, „Макпетрол“А.Д.-Скопје донираше  компјутери и комоди за дневниот престој.

Здружението за слепи лица од Скопје доби компјутери и верна картичка за гориво во висина од 40.000 денари.

Националниот сојуз на лица со телесен инвалидитет на Македонија - Мобилност Македонија, од „Макпетрол“А.Д.-Скопје доби верни картички за гориво во вредност од 90.000 денари.

На 2-ри Декември во просториите на ДХО „Даре Џамбаз“ во Скопје, а по повод одбележување на „3-ти Декември“ – Меѓународен ден на лицата со инвалидност, во организација на Националната федерација за спорт и рекреација на инвалидите на Македонија – Македонски параолимписки комитет се одржа екипно Државно првенство во шах, на кое со свои екипи учествуваа:

-Националниот сојуз на лица со телесен инвалидитет на Македонија Мобилност Македонија;

-Националниот сојуз на цивилни инвалиди од војната на Македонија;

-Националниот сојуз на слепи на Mакедонија и

-Националниот сојуз на глуви на Македонија.

Одржани „18^-ти Музички средби“ на лица со телесен инвалидитет на Македонија

Во големата сала на хотелот “Цар Самуил” во с.Банско-Струмица на 24.11.2012 година се одржаа осумнаесеттите музички средби на лицата со телесен инвалидитет на Македонија. Струмица и оваа година традиционално ги пречека најдобрите македонски интерпретатори на изворна народна музика од редот на лицата со телесна инвалидност. Оваа година манифестацијата имаше меѓународен карактер, а за да го добие тој епитет се погрижи гостинот од соседна Бугарија, интерпретаторот Кристијан Григоров од Велико Трново, кој настапи во конкуренција на натпреварувачката вечер со песната „Море пиле“. Имено, на иницијатива на нашиот музичар и тапанар на бендот „Феникс“, Николчо Делов од Кавадарци, Управниот одбор на Мобилност Македонија донесе одлука на средбата да покани шестчлена делегација од соседна Бугарија, раководни лица од фондацијата „Сила за живот“ кои секоја година во Поморје организираат слична манифестација на која учествуваат интерпретатори со најразличен вид на инвалидност. Во состав на бугарската делегацијата беа: претседателот на фиондацијата Јордан Стефанов, Зорница Стефанова – извршен директор на фондацијата, потоа музичарот аранжер и член на Управен одбор на фондацијата Александар Михајлов, интерпретаторот Кристијан Григоров и неговите родители како негови придружници и подржувачи на фондацијата „Сила за живот“.