МОБИЛНОСТ МАКЕДОНИЈА

Познатиот говорник, мотиватор и хуманист Ник Вујичиќ беше централна фигура на големиот хуманитарен настан кој се одржа во Скопје на 16 април во Спортскиот центар „Борис Трајковски“ каде за првпат говореше пред македонската публика. Тој е роден во 1982 година во Бризбејн, Австралија со ретко медицинско пореметување кое е необјасниво за докторите - тетра амелија синдром, а се карактеризира со отсуство на четирите екстремитети. Држел говори во 43 земји и разговарал со повеќе од 4.5 милиони луѓе, а и гледаноста на неговите видеа на интернет се милионски. Меѓу неговата публика се вбројуваат претседатели на држави и бизнисмени, средношколци, луѓе со инвалидитет, родители, деца, затвореници.  "Ако не можеш да постигнеш чудо, тогаш биди чудо" и "секој има избор да биде благодарен за она што го има или огорчен за она што го нема" е мотото на светски познатиот мотивациски говорник. Иако роден без четирите екстремитети, со исклучително тежок животен почеток, тој денес е успешен, целосно самостоен и со желба да инспирира други луѓе преку неговите говори на голем број конференции низ светот.

На 07.04.2016 година во „Куќата на фудбалот“ на Македонија се одржа тематска работилница во рамките на соработката на Мобилност Македонија и ФФМ на која во ова прилика се приклучи и Македонскиот олимписки комитет. Беа презентирани повеќе теми, од претседателот на Мобилност Македонија, Бранимир Јовановски: „ПОЗИТИВНИ ИСКУСТВА И ПРЕДИЗВИЦИ СО КОИ СЕ СООЧУВААТ ЛИЦАТА СО ИНВАЛИДИТЕТ“, од проект менаџерот на ФФМ, Ирена Бакревска-Милошевска: „ФУДБАЛ ЗА СИТЕ, ПРИСТАП ЗА СЕКОГО“, беа промовирани: Прирачник за создавање на инклузивни стадиони и позитивно искуство на ден на натпревар за навивачите со инвалидитет, и Службеници кои овозможуваат пристап на лицата со инвалидитет од локалните клубови од првата лига.

„Ве поздравувам од името на Фудбалската федерација на Македонија, наше е задоволството да се дружиме со поранешни големи спортисти, со нашите пријатели од Мобилност и нашите драги колеги од Македонскиот Олимписки Комитет. Оваа соработка отвора нова врата на меѓуинституционална, но и човечка соработка помеѓу нас и заедницата на луѓе со инвалидност во нашата земја. Стануваме свесни за нивните потреби, но и за нашите можности да одговориме на истите“, истакна Илчо Ѓорѓиоски, претседател на ФФМ, за официјалниот сајт на федерацијата.

На 04.04.2016 година во Музејот на македонска борба беше одржана прес конференција за промоција на вториот гранд за самовработување на лицата со инвалидност на која присуствуваа заменик министерот за труд и социјална политика Диме Спасов, Директорот на СВРМ Влатко Поповски и претседателите на националните сојузи на лица со телесен инвалидитет Бранимир Јовановски, на слепи Жарко Селковски и на глуви Васко Марковски.

Сите заинтересирани лица со инвалидност кои се работоспособни од 04.04.2016 година ќе можат да аплицираат за грант за самовработување преку отворање сопствен бизнис во висина од 270 илјади денари. Дополнително, тие ќе можат да вработат уште најмногу две лица, за кои ќе добијат по 92.000,00 денари. Овие лица може, но не мора, да бидат со инвалидност. Средствата од грантот се наменети за опрема и материјали. За адаптација на работното место на лицето со инвалидност АВРМ ќе им исплати и дополнителни 100 илјади денари, а девет месеци по отворањето на бизнисот, доколку правното лице уплаќало придонеси и плати ќе може да аплицира за неповратни средства во висина од 20 просечни плати, согласно Законот за вработување на инвалиди.

На 20.02.2016 година во Скопје до ДХО „Даре Џамбаз“ се одржа седница на редовно годишно Собрание на Мобилност Македонија со следниот дневен ред:

1.  Разгледување и усвојување на записникот од Конститутивната седница на  Собранието на Мобилност Македонија одржана на 28.02.2015 година

2. Разгледување и усвојување  на Извештајот за  работа на Мобилност Македонија за 2015 година;

3. Разгледување и усвојување на Извештајот од Надзорниот одбор за извршената контрола врз материјално-финансиското работење на Мобилност Македонија во 2015 година и Разгледување и усвојување на Извештајот за финансиско и материјално работење на Мобилност Македонија за 2015 година

4. Разгледување и усвојување на Извештаите од комисиите за попис на средствата на Мобилност Македонија;

5. Донесување  Програма за работа на  Мобилност Македонија за 2016 година;

6.Донесување Финансов план за потребните средства за работа  на  Мобилност Македонија за 2016 година;

7. Донесување одлука за состојбата со здружението Мобилност Охрид 1988;

8. Прашања и предлози

На 05.02.2016 година претставниците на Националниот совет на инвалидските организации на Македонија (НСИОМ) во кој што членуваат седум национални сојузи на лицата со инвалидност: Националниот сојуз на слепи на Република Македонија, Националниот сојуз на глуви и наглуви на Република Македонија, Националниот сојуз на лица со телесен инвалидитет на Република Македонија Мобилност, Републичкиот центар за поддршка на лица со интелектуална попреченост Порака, Националниот сојуз на цивилни инвалиди од војната на Македонија, Националната федерација за спорт и рекреација на инвалиди на Македонија, т.е. Македонскиот олимписки комитет и Националниот сојуз на инвалиди на трудот на Република Македонија, остварија работна средба со Министерот за труд и социјална политика д-р Фросина Ташевска-Ременски.