МОБИЛНОСТ МАКЕДОНИЈА

На 4 август оваа година се одржа XXIV издание на Музичките средби на лицата со телесен инвалидитет во организација на Мобилност Македонија. Музичките средби како фестивал по четврти пат се одржаа во рамките на струмичкото културно лето „Опен Фест Струмица“. На манифестацијата зедоа учество 12 учесници со изведби на македонски народни песни. Нив ги придружуваше оркестарот на Мобилност Македонија КУД „Феникс“.

Водител на настанот беше Ѓорги Калајџиев кој истовремено беше и член на жири комисијата покрај Зоран Вета и Костадин Стојанов – познати музички работници од Струмица.
Првата награда и припадна на Јованка Атанасова од Велес која ја испеа песната „Море сокол пие“. Втората награда ја освои Трајче Лазаров од Кавадарци со песната „Разболе се Ирина мома“, а третото место му припадна на Петре Јованов од село Подареш – Радовиш кој ја испеа песната „Жени ме мамо“.

Мобилност Македонија оствари работна средба со министерот за здравство, д-р Венко Филипче. На средбата го запознавме министерот за активностите што нашиот сојуз ги презема за подобрување на здравствената заштита на лицата со телесен инвалидитет. Најавивме иницијатива за измени и дополненија на Законот за здравствена заштита во однос на: зголемување на старосна граница за потреба од придружба на дете со телесен инвалидитет при болничко лекување, зголемување на лимитот на болнички денови за успешно санирање и третирање на одредени состојби, ревизија на право на рехабилитација и опоравок како потреба, а не како продолжено болничко лекување, лекарства и зголемување на буџет на клиники за набавка на лекарства за третман на одредени дијагнози, како и иницијативата која е во рамките на одлучување на ФЗОМ за ортопедски помагала, за која во соработка со партнерски организации сработивме и Правилник за измени и дополненија на Правилникот за индикации за остварување на правото на ортопедски и други помагала, и Список на ортопедски помагала со ИСО 9999 стандарди, кои уште пред еден месец ги доставивме до ФЗОМ и очекуваме повик за работна средба во однос на конечно разрешување на ова прашање и воведување на пософистицирани ортопедски помагала и делови за нивна изработка на терет на фондот. Ова последново од причина што минатата година министерот Филипче (во тоа време советник на премиерот Заев за областа на здравството), учествуваше на работните средби кои ги имавме на оваа тема со директорот на ФЗОМ, Ден Дончев и неговиот тим.

Во Службен весник на РМ број 13 од 22.01.2018 година, на страна 12 и 13 е објавена Програмата за рефундирање на средства платени како царински давачки, данок на додадена вредност и акциза за набавка на патнички автомобил за лица со најмалку 80% инвалидност на долните екстремитети, лица со умерена, тешка и длабока интелектуална попреченост, за потполно слепи лица со придружник и за потполно глуви лица, за 2018 година. 

Истата веќе е стапена на сила и сите заинтересирани членови можат да побараат преку надлежните Центри за социјална работа во местото каде живеат да ја комплетираат потребната документација за рефундирање на средства.
Последен рок за поднесување на барање е 30.09.2018 година, но ви сугерирам да не го чекате последниот ден заради можни административни постапки за комплетирање на барањата.

ПРОГРАМАТА ВИ ЈА ПРЕЗЕНТИРАМЕ ВО ЦЕЛОСТ:

Со одлука на градоначалникот на општина Велес, Аце Коцевски, на ден 29.01.2018 година во салата за состаноци на општината беше формиран Локален грагански совет од 17 члена, кој ќе работи како помошно тело на градоначалникот во работата и развојот на општината.

Мобилност Велес партицишира во телото со двајца свои преставници, Горан Здравков и Миланчо Арсовски.
Помошно тело составено од 17 претставници на граѓански здруженија и новинар ќе имаат можност да му помагаат, предлагаат иницијативи и да бараат решенија заедно со Градоначалникот Аце Коцевски преку кои ќе се подобрува квалитетот на живот во локалната заедница. Телото, кое денеска беше формирано, ќе се состанува по потреба.

ЕВН Македонија донираше возило наменето за задоволување на потребите на лицата со телесен инвалидитет, членови на здружението „Мобилност Тетово и Гостивар“. Возилото кое носи порака „Со љубов за полесно движење”, ќе се користи за превоз на лицата со телесен инвалидитет при лекарски прегледи, настава и други социјални активности.

„Веќе три години живеам во Република Македонија и сметам дека е прекрасна земја, но сепак би рекол дека нема многу добри услови за лицата со посебни потреби. За тоа не смееме да впериме прст само во државата и во локалната самоуправа, некогаш треба и граѓанското општество и компаниите да направиме нешто за подобрување на тие услови“ рече г-дин Штефан Петер, Претседател на Управниот одбор на ЕВН Македонија.

„Како одговорна компанија сме горди што со овој чин и преку соработката со граѓански здруженија и организации придонесуваме за подобрување на условите за лицата со посебни потреби” додаде г-дин Петер на примопредавањето на донацијата.

На настанот присуствуваше и Градоначалничката на општина Тетово, г-ѓа Теута Арифи, која изрази благодарност за донацијата.